ரியாத் :- 74வது இந்திய சுதந்திர தினத்தை முன்னிட்டு ரியாத் மாநகரில் தமிழ்நாடு தவ்ஹீத் ஜமாஅத் ரியாத் மண்டலத்தின் 106வது மாபெரும் இரத்ததான முகாம் நேற்று 14-08-2020 வெள்ளிக்கிழமையன்று நடைபெற்றது.

பல்வேறு நோய் பரவல் தடுப்பு முன்னெச்சரிக்கை நடவடிக்கைகளுடன் காலை 9:00 மணிக்கு துவங்கிய இம்முகாமில் தன்னார்வ தொண்டர்கள் கொடையாளிகளை பாதுகாப்புடன் இரத்த வங்கிக்கு அழைத்து வந்தனர்.

மேலும் கொரோனா நோய்த் தொற்று மற்றும் தனி மனித இடைவெளி போன்ற பல்வேறு கட்டுப்பாடுகள், நடைமுறை சிரமங்கள் இருந்தும் இரத்த தட்டுப்பாட்டை நிவர்த்தி செய்யும் மருத்துவமனையின் பிரதான கோரிக்கையை ஏற்று ஒரு வார கால அவகாசத்திற்கும் குறைவான நாட்களில் ஏற்பாடு செய்யப்பட்ட இந்த இரத்ததான முகாமில் ரியாத் மண்டலத்தின் பல்வேறு கிளைகளிலிருந்தும் “145க்கும் மேற்பட்ட குருதி கொடையாளர்கள் கலந்து கொண்டு, 119 பேர் வரை பதிவு செய்யப்பட்டு” உடற்தேர்வு மற்றும் மருத்துவ பரிசோதனைகளுக்குப் பிறகு “106 நபர்கள் இரத்ததானம்” செய்தனர். அல்ஹம்துலில்லாஹ்!

தமிழ்நாடு தவ்ஹீத் ஜமாஅத்தின் ரியாத் மண்டல மருத்துவ அணி செயலாளர் சகோ. அஹமது முக்தார் கூறுகையில் எங்களது ஜமாஅத் சார்பாக இந்தியா மற்றும் வளைகுடா நாடுகளில் கொரோனோ பேரிடர் காலத்தில் ஏற்பட்டுள்ள இரத்த தட்டுப்பாட்டை போக்கும் விதமாகவும், எப்படி எங்களின் முன்னோர்கள் இந்திய விடுதலைக்காகவும், முன்னேற்றத்திற்காகவும், நம் நாட்டின் தேச நலனிற்காகவும் போராடினார்களோ, அது போன்று நமது நாட்டின் நலனுக்காகவும், பிற நாட்டின் நலனுக்காகவும் 100க்கும் மேற்பட்ட இரத்ததான முகாம்கள் உலகின் பல்வேறு பகுதிகளில் ஆகஸ்ட் மாதம் முழுவதும் முழு வீச்சில் நடந்து கொண்டிருக்கிறது. அதன் ஒரு அங்கமாக நிகழ்கால கொரோனா பேரிடர் காலத்தில் நோயாளிகளின் இரத்த தேவைகளை கருத்தில் கொண்டும், மருத்துவமனைகளின் கோரிக்கைகளை ஏற்றும் தேவையான எல்லா நேரங்களிலும் உயிர் காக்கும் இரத்ததானம் செய்து வருகின்றோம். கொரோனோ பேரிடர் காலத்தில் மட்டும் அவசர தேவைக்காக இதுவரை 250 யூனிட்கள் வரை இரத்தம் தானமாக ரியாத் மண்டலம் சார்பாக வழங்கப்பட்டுள்ளது.

முகமறியாத மக்களின் உயிர்காக்க உதவும் இந்த உன்னதமான பணி இந்திய நாட்டின் ஒற்றுமையையும், சகோதரத்துவத்தையும் பறைசாற்றும் விதமாகவும், இந்திய நாட்டின் பன்முகத்தன்மையை பிறநாடுகளில் பிரதிபலிப்பது இந்தியர்களின் தியாகங்ககளையும், தேச பற்றையும் பிறநாடுகள் போற்றும் விதமாக அமைந்துள்ளதாகவும், இது தமிழ்நாடு தவ்ஹீத் ஜமாஅத் ரியாத் மண்டலம் நடத்தும் 106வது முகாமாகும் என்றார்.

…எல்லா புகழும் இறைவனுக்கே….

என்றும் மனிதநேயப் பணியில்…
தமிழ்நாடு தவ்ஹீத் ஜமாஅத்,
ரியாத் மண்டலம்.