தமிழ்நாடு தவ்ஹீத் ஜமாஅத்

இஸ்லாத்தில் தடை செய்யப்பட்ட தீமைகள்!

மனிதர்களாக படைக்கப்பட்ட நாம் அனைவரும் மரணிக்க கூடியவர்களே! நாம் அனைவரும் மறுமை நாளில் நாம் இவ்வுலகத்தில் செய்து கொண்டிருப்பது பற்றி விசாரிக்கப்பட உள்ளோம் என்பது அனைத்து முஸ்லிம்களின் ஒருமித்த கருத்தாகும், அப்படி விசாரிக்கப்படும் பொழுது இறைவனால் பெரும் கோபத்திற்கு உரிய தடை செய்யப்பட்ட தீமைகள் பற்றி இந்த துண்டு பிராசுரத்தின் மூலம் காண்போம்!

ஷிர்க் எனும் இணைவைத்தல்!‎

‎’நிச்சயமாக அல்லாஹ் தனக்கு இணைவைப்பதை மன்னிக்கமாட்டான்; இதைத்தவிர, (மற்ற) ‎எதையும் தான் நாடியவர்களுக்கு மன்னிப்பான்; யார் அல்லாஹ்வுக்கு இணைவைக்கிறார்களோ ‎அவர்கள் நிச்சயமாக மிகவும் பெரிய பாவத்தையே கற்பனை செய்கின்றார்கள்’ (அல்குர்ஆன் 4:48)‎

‎ஜோதிடம் மற்றும் குறிபார்த்தல்!‎

‎ நபி (ஸல்) அவர்கள் கூறினார்கள்: யார் குறிகாரன் அல்லது வருங்காலத்தைக் கணித்துச் சொல்பவனிடத்தில் சென்று அவன் கூறுவதை உண்மை எனக் கருதினால் அவன் நபி (ஸல்) அவர்களுக்கு அருளப்பட்ட வேதத்தை (குர்ஆனை) நிராகரித்து விட்டான். அறிவிப்பவர் : அபூஹுரைரா (ரலி) நூல் : அஹ்மத் (9171)

‎கிரகங்கள் மற்றும் நட்சத்திரங்கள் நன்மை செய்வதாக நம்புதல்!‎

நபி(ஸல்) அவர்கள் ஓர் இரவு மழை பொழிந்த பின் ஹுதைபிய்யா எனுமிடத்தில் எங்களுக்கு ஸுப்ஹுத் தொழுகை நடத்தினார்கள். தொழுது முடித்ததும் மக்களை நோக்கி ‘உங்களுடைய இறைவன் என்ன கூறினான் என்று அறிவீர்களா?’ என்று கேட்டார்கள். அதற்கு மக்கள் ‘அல்லாஹ்வும் அவனுடைய தூதருமே நன்கு அறிந்தவர்கள்’ என்றனர். அதற்கு நபி(ஸல்) அவர்கள், ‘என்னுடைய அடியார்களில் என்னை நம்பியவர்களும் என்னை நிராகரிப்பவர்களும் இருக்கின்றனர். அல்லாஹ்வின் அருளால், அவனுடைய கருணையால் எங்களுக்கு மழை பொழிந்தது என்று கூறுகிறவரே என்னை நம்பியவர். நட்சத்திரங்களை நிராகரித்தவர். இன்னின்ன நட்சத்திரங்களால் எங்களுக்கு மழை பொழிந்தது என்று கூறுகிறவரே என்னை நிராகரித்து நட்சத்திரங்களை நம்பியவர்’ என்று அல்லாஹ் கூறினான் எனக் குறிப்பிட்டார்கள். அறிவிப்பவர்: ‎ஸைத் இப்னு காலித் (ரலி), ஆதாரம்: புஹாரி 1038

‎தாயத்து   அணிதல்!‎

நான் அல்லாஹ்வின் தூதர் (ஸல்) அவர்களுடன் பிரயாணம் ஒன்றில்  இருந்தேன்.  அல்லாஹ்வின் தூதர் (ஸல்) அவர்கள்  தூதுவர் ஒருவரை அனுப்பி,”எந்த  ஒட்டகத்தின் கழுத்திலும்   கயிற்று மாலையோ அல்லது வேறெந்த மாலையோ இருக்கக் கூடாது. அப்படியிருந்தால் கட்டாயம் அதைத் துண்டித்து விட  வேண்டும்” என்று அறிவிக்கச் செய்தார்கள். அறிவிப்பவர் : அபூ பஷீர் (ரலி) நூல் : புகாரி 3005

‎துர்ச்சகுனம் பார்த்தல்!‎

இறைத்தூதர்(ஸல்) அவர்கள் கூறினார்கள்’ தொற்றுநோய் கிடையாது. பறவை சகுனம் ஏதும் கிடையாது. ஆந்தை சகுனம் ஏதும் கிடையாது. ‘ஸஃபர்’ மாதம் பீடை என்பதும் கிடையாது. என அபூ ஹுரைரா(ரலி) அறிவித்தார். புகாரி 5757

‎முகஸ்துதி (பிறருக்கு காண்பிப்பதற்காக அமல் செய்தல்)‎

‎நயவஞ்சகர்கள் அல்லாஹ்வை ஏமாற்ற நினைக்கின்றனர். அவனோ அவர்களை ஏமாற்றவுள்ளான். அவர்கள் தொழுகையில் நிற்கும்போது சோம்பேறிகளாகவும், மக்களுக்குக் காட்டுவோராகவும் நிற்கின்றனர். குறைவாகவே அல்லாஹ்வை நினைக்கின்றனர். அல்குர்ஆன் 4:142

‎காலத்தை ஏசுதல்!‎

இறைத்தூதர்(ஸல்) அவர்கள் கூறினார்கள்’ வல்லமையும் மாண்பும் உடைய அல்லாஹ் சொன்னான்: ஆதமின் மகன் என்னைப் புண்படுத்துகிறான். அவன் காலத்தை ஏசுகிறான். நானே காலம் (படைத்தவன்); என் கையிலேயே அதிகாரம் உள்ளது; நானே இரவு பகலை மாறி மாறி வரச் செய்கிறேன். என அபூ ஹுரைரா(ரலி) அறிவித்தார். புகாரி 4826

‎சமாதி வழிபாடு!‎

‘அல்லாஹ்வையன்றி நீங்கள் யாரை அழைக்கிறீர்களோ அவர்கள் உங்களைப் போன்ற ‎அடிமைகளே!’ (அல்குர்ஆன் 7:194)‎

யூத, கிறித்தவர்களை அல்லாஹ் சபிப்பானாக! ஏனெனில் அவர்கள் தங்கள் நபிமார்களின் சமாதிகளை வணங்குமிடமாக ஆக்கி விட்டனர்  என்று நபிகள் நாயகம் (ஸல்) கூறியுள்ளனர். அறிவிப்பவர்: ஆயிஷா (ரலி) நூல்: புகாரி 436, 437, 1390, 3454, 4441, 4444, 5816

சமாதிகளில் கட்டடம் கட்டுவதை நபிகள் நாயகம் (ஸல்) அவர்கள் தடுத்தார்கள். (முஸ்லிம் 1765, திர்மிதீ 972)   

இத்தகைய சிந்தனை உடைய முஸ்லிம்கள் தாங்கள் நிலையை மாற்றி நிலையில்லாத இந்த உலக வாழ்கையை விட நிலையான மறுமை வாழ்கையே சிறந்தது என்பதை தங்களுடைய மனதில் நிறுத்த வேண்டும். மேலும் இஸ்லாத்தின் போதனைகளை மற்றவர்களிடம் பரப்ப தங்களால் ஆன முயற்சியை மேற்கொண்டு இம்மை மற்றும் மறுமையில் இறை திருப்தியை பெற வேண்டும், இன்ஷா அல்லாஹ்…

இந்த fileயை download செய்ய இங்கே கிளிக் செய்யவும்